Isumat.com/Abril 3, 2023
An Northern Samar in lakip han upat nga probinsya ha Pilipinas kun diin magtitindog an usa nga langyawanon nga investor hin Offshore Wind Energy Projects.
Sumala han Department of Energy, an Copenhagen Infrastructure Partners (CIP) han Denmark in nakatalaan maghimo han nasabi nga mga planta hin enerhiya kun diin gagamiton an hangin ha mga kadagatan nga nasasakop han Camarines Sur ngan Camarines Norte, Northern Samar, sugad man Pangasinan ngan La Union.
Ini nga mga proyekto in nagkakantidad hin singko bilyones dolyares ngan ginlalauman nga makakagproduser hin 2000 megawatts. An planta ha Northern Samar in ginbabanabana makakagsuplay hin 650 megawatts.
Nagsering an Energy Department nga gintatarget han CIP nga matapos ini nga mga proyekto ha sulod hin unom ka tuig.
Labot la han pagpadamo han suplay han elektrisidad, an nasabi nga mga proyekto in makakaghatag hin sobra kuatro mil nga trabaho ha publiko.
Ini nga proyekto in kaparte han paningkamot han Pilipinas nga magtikadamo an mga planta hin kuryente kun diin an surok amo an renewable energy nga makakabaton han mga pag-ayat ngan isyu han climate change.
Kadungan hini, an CIP in nagpahayag nga katapos hini nga mga proyekto, magtitindog pa hira hin iba nga renewable energy projects ha iba nga parte han nasud, ngan ini an ira paagi basi makabulig para han limpyo ngan sustenado nga pag-uswag han enerhiya ha Pilipinas.
Hadin Marso, iginreport gihapon nga an European Union in naghatag hin pondo para han mga kooperatibe han elektrisidad ha probinsya han Samar basi igpalit han mga ekipahis para han solar energy projects. #
