Isumat.com/ Marso 27, 2023
Naghikog in usa nga preso ha sulod mismo han iya selda ha Gamay, Northern Samar, maagahon han Marso 26, 2023.
Ha imbestigasyon han PNP, ginkilala an biktima nga hi Jonathan Lim, 42 anyos, inasaw-an ngan residente han mao nga bungto.
Nadiskubre han bantay nga pulis nga nabitay an lawas ni Lim pasado alas singko han maagahon. Gintalinguha nga madara ha hospital an biktima pero binawi-an han kinabuhi.
Sumala pa han report, nag-uusaan la hi Lim ha selda ngan gingamit niya ha pagbitay an iya jacket.
Han Enero 2023, hiya in nahipaslak ha karsel tungod han kaso nga pagpatay.
Ha pag-asoy han misis ni Lim, waray daw senyales nga magpapakamatay hiya kay an sering la ha iya kun nabisita hiya nga deri mabaraka ngan timangnu-on la an ira duha nga mga anak.
Waray gihapon nakit-an nga tigaman an mga pulis nga may maraot nga plano hi Lim kay na-atender pa ngani hiya han Bible service dida han police station.
Igindugang pa han report, waray magbilin hin suicide note an biktima. #
