Isumat.com/ Marso 27, 2023

Naawat an kinabuhi hin usa nga motorista dida hin aksidente ha kadalanan nagdadabi hin duha nga behikulo kakulop, Marso 26, ha Brgy Olotan, Jaro, Leyte.

Ha imbestigasyon han Jaro PNP, ginkilala an namatay nga hi Christian Jay Bardelas, 35 anyos, ulitawo, seaman, ngan nag-uukoy ha Brgy Balud, Capoocan, Leyte.

Banda alas 4 han kulop, an motorsiklo nga ginmamaneho-an ni Bardelas in nagsosolsog han national highway tikadto ha Capoocan tikang ha Tacloban City.

Hadto nga takna, an Suzuki nga kotse nga ginmamaneho-an ni Leonardo Penaranda, 73 anyos, residente han Tacloban City in nagbibiyahe tikadto han dereksyon ha Brgy Olotan tikang ha bungto han Barugo.

Pag-abot ha lugar han panhitabo, nag U-turn an kotse ngan sumampak an motorsiklo ha wala nga pugtot han kotse.

Tungod han makusog nga pwersa han pagbangga, hi Bardelas in nag-antos hin mga injuries ha magkalainlain nga parte han lawas ngan kadagmitan gindara ha Carigara District Hospital pero namatay banda alas 6 han gab-i.

Hi Penaranda ug an duha nga behikulo in ginkustudiya han Jaro PNP Station para han kaangayan nga disposisyon. # (Photo courtesy by Gil Aniceto Tamayo)