Isumat.com/ Marso 26, 2023

Ginkumpirmar han Criminal Investigation and Detection Group (CIDG)-Region 8 nga an ira buhatan in nagsalawad hin murder complaint kontra kan San Isidro, Leyte Mayor Remedio Veloso ngan tulo pa nga iba kasumpay han pagpataya kan Levi Mabini, anay Municipal Administrator han nasabi nga bungto.

Ha pakighimangraw han IsumatNews kan LtCol Antonio Rotol, pinuno han CIDG-Region 8, nagsering an opisyal nga iginsalawad ha Leyte Provincial Prosecutors Office ha Calubian, Leyte an mao nga reklamo hadton Marso 21, 2023.

Hi Rotol, nga pira pala ka adlaw paglingkod han iya bag-o nga pwesto in nagpahayag nga labot la han alkalde, lakip gihapon han reklamo an bugto han mayor nga hi Emmanuel Veloso, Cayetano Dagandan nga empleyado han LGU ngan paryente han magbugto, ug an pulis nga hi Manuelito Sidaya.

Hadton 2019 pira ka adlaw antis an election, hi Mabini in pinusil ngan pinatay hin waray panhikilal-i nga mga suspetsado ha usa nga gasolinahan ha San Isidro.

Sumala han mga tagreklamo, an grupo han magbugto nga Veloso an nagplano han pagpatay han biktima.

An Provincial Prosecutions Office in magdudumara hin Preliminary Investigation han reklamo basi madeterminar kun igbabasura o igsasampa ha korte an nasabi nga murder complaint.

Hadin Disyembre 2022, an bugto nga babaye ni Mayor Veloso in namatay han ambuson an iya behikulo nga ginsasakyan ha Kananga, Leyte.

Pira ka bulan an nakalabay katapos hini, an propyedad ni Emmanuel ha San isidro an ginronda han CIDG kun diin narekupo in pira nga armas de fuego.

Tobtob yana nga mga panahon, deri nasasabtan kun ini nga mga panhitabo in may paghisumpay ha tagsatagsa.