Isumat.com/ Marso 27, 2023

Nagkatatad-an in duha nga senior citizen nga waray na mga kinabuhi ha magkalain nga insidente ngan magka-iba gihapon nga rason han ira kamatay ha probinsya han Leyte hadin nag-agi nga adlaw.

Ha report han Inopacan, Leyte PNP Station, gintotoohan nga kalumos an rason han kamatay han biktima ginkilala nga hi Marciano Manacap, 82 anyos, ngan residente han Brgy Tao-Taon han mao nga bungto.

Ha inisyal nga imbestigasyon, usa nga tanod han nasabi nga barangay an nagsumat ha kapulisan nga han alas 7:30 han aga, Marso 26, 2023, hiya in nakakita hin lawas hin tawo didto han salog. Kadagmitan nga pumakadto an mga otoridad basi beripikaron an impormasyon.

Nakit-an han kapulisan an biktima ug ha ira pag-ino-ino, nalumos ini. Nagsering an anak han biktima nga antis an panhitabo, nagtagay-tagay an iya amay ngan sugad han iya nababatasanan, iya ginpanginano an iya karabaw nga nakahigot ha ligid han salog.

Samtang, didto naman ha bungto han Leyte, Leyte, natad-an an patay nga lawas ni Avelino Pepito, 60 anyos, byudo ngan residente han Brgy Kawayan han nasabi nga bungto.

Alas 8:30 han aga, Marso 26, 2023, nakakarawat hin impormasyon an Municipal PNP Station kasumpay han insidente.

Dida han imbestigasyon, hadto pa han Marso 19 nga waray na kitaa hi Pepito ngan dida la hito nga adlaw nakit-an an biktima kay an mga katawhan nga nangungukoy harani han lugar in nakabaho hin malain nga baho.

Han ira panginanoon, an baho in tikang hin nadudunot nga patay nga lawas hin tawo. Sumala han bugto han misis han biktima, hi Pepito in nag-aantos hin dementia ngan iba pa nga problema ha panlawas ngan katapusan nakit-an nga buhi pa hadton Marso 19, 2023. #