Isumat.com/ Marso 27, 2023

Maniningkamot an DSWD-Eastern Visayas nga deri magkukulang an mga hinabang labi na an family food packs ha panahon han kalamidad ha bug-os nga rehiyon.

Dida han press conference han Regional Development Council, hi DSWD Regional Director Grace Subong in nagpahayag nga dudugangan han ahensya an naka-andam nga family foods packs.

Hapagkayana, 30 mil nga food packs an pirmi naka-andam, pero target han DSWD nga himoon ini nga 50 mil nga kahon hin pagkaon ha bisan ano nga oras nga pagkikinahanglanon.

Sumala kan Subong, ini an usa han mga pitad nga hihimoon han ahensya komo kabatunan han posible nga pagtikagrabe han epekto han climate change nga nagdudurot hin mga kalamidad.

Iginsumat pa han opisyal nga nakikigsumapayan hira ha mga lokal nga pang-gubyernuhan basi makagtudlok hin kadugangan nga lokasyon nga hihipusan han food packs basi ma-ipanhatag dayon ha oras han panginahanglan.

Partikular nga gintatagan hin prayoridad han DSWD an pagbutang han food packs ha mga lokasyon nga madadara dayon an ayuda ngadto han mga island towns ngan tay-aw nga mga lugar han rehiyon.

Ha luyo nga bahin, nagpapadayon naman an pagdistribuer han DSWD han mga ayuda ha ilarum han programa nga Assistance to Individuals in Crisis Situation (AICS).

Han nag-agi nga pira ka semana, yinukot-yukot nga benefeciario ha magkalainlain nga parte han Sinirangan Bisayas an nagpakaga-agom hin ayuda financial ha ilarum han mao nga programa.

Kaparte naman han programa nga 4Ps, aada ha encoding ngan beripikasyon an mga impormasyon nga nahikay dida han Pantawid Special Household Assesment.

An nagdudumara han 4Ps in nag-interbyu han mga panimalay nga waray hadto mahilakip han assesment han 2019. Pinaagi hini, matutudlok han ahensya an mga kablas nga pamilya nga puede mahi-upod han bag-o nga Listahanan.

An Listahanan in may panuyo nga makilal-an kun hira hin-o ngan diin naukoy an mga kablas ha aton nasud. #