Isumat.com/Abril 3, 2023
Lima ka tawo an nagkadadakop ngan nabungkag in usa nga drug den sugad man nakumpiskar in kadam-an nga iligal nga droga ha magkalain nga anti-illegal drugs operations ha Babatngon, Leyte ngan Tacloban City hadin nag-agi nga duha ka adlaw.
Ha report han PDEA-Region 8, an ira mga operatiba upod an mga personales han Babatngon PNP, Leyte PNP, ngan Intelligence Division han PNP Regional Office an nagdumara hin buy-bust opoeration alas 8:05 han gab-i ha Brgy District 4, Babatngon, Leyte hadton Abril 1, 2023.
Dida han mao nga insidente, na-aresto an mga suspetsado ginkilala nga hira Rhea Mae Delis alyas Rhea Poblete, gin-aalegar nga nagdudumara han drug den; ug an iya mga bisita hadto nga takna nga hira Beverly Biron, Roselyn Resomadora, ngan Bryan Parina. An mga gintatahapan in tanan residente han mao nga bungto.
Nakumpiskar ha mga suspek in porlomenos 15 gramos hin gin-aalegar shabu balor hin 102 Mil pesos.
Samtang, arestado naman an Regional Rank Number 3 Target dida han operasyon han mga otoridad alas 10:50 han gab-i, Marso 31, 2023 ha Brgy 91, Abucay, Tacloban City.
Ha report han PNP Regional Office, an suspetsado nga nakwelyuhan amo hi alyas Mar, 27 anyos, ulitawo, ngan residente han Brgy Maribe, Tanauan, Leyte.
Nagsering an mga otoridad nga an suspetsado in usa nga drug courier ngan nagsusuplay hin droga ha mga bodegeros ha Tacloban ngan paghagrani nga lugar ha Leyte.
Narekupo tikang han suspek in gin-aalegar nga droga may timbang nga 25 gramos ngan balor hin 170 Mil pesos.
An mga suspetsado dida han duha nga operasyon in maatubang hin mga kaso tungod han pakatalapas han Comprehensive Drugs Act of 2002. #
