Isumat.com/Agosto 31, 2022
Pira na kadekada an sakripisyo ngan kalbaryo han tagkonsumo hin tubig nga nadepender ha Leyte Metro Water District (LMWD) ngan sugad-sugad nga desperado na hira hit sitwasyon nga bisan ngani an katudlok han bag-o nga magdudumara han water district in waray na hira labot.
Kakulop, Agosto 30, 2022, iginpasamwak ni Out-going GM Pastor Homeres nga an maliwan ha iya epektibo Setyembre 1, 2022 komo mangungulo han LMWD amo hi Ronnie Cornico. Hi Cornico in anay nagin mangulo han TOMECO ngan Executive Assistant ha City Government ngan kilalado nga apiki kan Mayor Alfred Romualdez.
Ini nga katudlok kan Cornico in nagsarang ha social media ngan magkalainlain an mga reaksyon han mga konsumidor han tubig.
Damo an naglalamano kan Cornico ngan nagpapa-abot hin “Congrats ngan Good Luck” ha iya, pero labaw nga darudamo an nagsering nga waray hira labot bisan hin-o pa it manager ha LMWD, an importante nga magin tuhay it serbisyo.
Mayda liwat nagsering nga unta an igpapasamwak nga mayda na awas ngan deri lugod an bag-o nga manager. Pira liwat nga netizens an nagsering nga unta may dara nga tubig an bag-o nga GM.
Nagpapaki-ana liwat an kadam-an nga konsumidor kun ano it magigin solosyon ni Cornico hini nga dako nga problema han serbisyo han LMWD.
Usa nga mahinungdanon nga reaksyon amo an iya pag-ayat kan Cornico nga igpakita kun mayda hiya insakto nga abilidad pagkapot han LMWD. #
