Isumat.com/Agosto 31, 2022
Naghimo hin kalugaringon nga paningkamot an Borongan City LGU ha panguna ni Mayor Jose Ivan Dayan Agda agud maka-agom hin waray parupasahe ha transportasyon an kadam-an nga sektor didto han nasabi nga syudad.
Yana nga semana, umabot na ngadto ha Borongan an duha ka unit hin bus para han programa nga Libreng Sakay han LGU ngan ini in magseserbe ha mga kwalipikado nga Boronganon.
Lima nga unit hin bus an ginpahimo han LGU ngan ini nga duha nga syahan nga umabot ha Borongan in nakatalaan para han Test Run.
Gintikangan na gihapon an panlista o pagparehistro basi maseguro nga makaka-agom an labi nga nagkikinahanglan sugad han mga senior citizens, PWD, health workers, estudyante ngan lokal nga mga turista.
An mga tinaglawas han City Government in mapakadto han hagrayo nga mga barangay han syudad basi deri na pumakadto ha City Hall an mga magpapalista.
Subay han pahayag han LGU, ini nga gi-os in agud abaton gud han mga Boronganon nga nagtitimangno ha ira an lokal nga pangobyernuhan.
Ginpondohan han LGU an nasabi nga proyekto ngan ginhimo ini nga mga bus ha Subic, Zambales. Pira na ka bulan an nakalabay, personal nga gin-inspection ni Agda an paghimo han mga unit han iya bisitahon an planta ha Zambales. #
