Isumat.com/Agosto 30, 2022
Ano an motibo hin usa nga sundalo nga nakadestino ha Samar nga nagin usa hiya han mga gintatahapan nga nalambigit pagpatay hin barangay kapitan ha Javier, Leyte?
Ini an anggulo nga pag-uutingkayon han mga imbestigador katapos la nga ma-aresto an suspetsado ginkilala nga hi Army Sgt Alexandro Calda, 33, anyos, residente han Brgy Mercedes, Catbalogan City ngan nakadestino ha 63rd Infantry Battalion, Brgy Guirang, Basey, Samar.
Ha report han Javier, Leyte PNP Municipal Office, hi Calda in nadakop ha Tacloban City, maagahon han Agosto 29, 2022 ngan narekupo tikang ha iya in usa nga kalibre 45 ngan mga bala.
Subay han impormasyon, ini nga sarhento in suspetsado han pagpusil ngan pagpatay kan Joel Rinos, kapitan han Brgy Inayupan, Javier, Leyte. Natabo an insidente hadton Agosto 22, 2022 kun diin ginpanmumusil an biktima samtang nagmamaneho hin motorsiklo ha Brgy Caranhug, Javier.
An mga otoridad in nagmanman han mga gi-os ni Calda kataliwan la nga makit-an hiya dida han CCTV han Barangay Intelligence Network ha Javier.
Dida han iya kadakop, an sundalo in naka-motor ngan nakit-an an pusil ha U-Box han motorsiklo han magdumara hin inspection an mga tinubyanan han balaud.#
