Catarman Mayor Francisco Aurelio Rosales III.

Isumat.com/Agosto 31, 202

Gin-dismiss han RTC Branch 20 ha Catarman, Northern Samar an election protest kontra han alkalde han bungto nga hi Francisco Aurelio Rosales III.

Dida han desisyon han korte nga iginpagawas han Agosto 26, 2022, nagsering an husgado nga valido an proklamasyon kan Rosales ngan hiya an ginpili nga mayor han Catarman.

Hi Engr Lope Dorado Jr nga kumandidato ha parehas nga posisyon dida han nag-agi nga piniliay, an nagsalawad han protesta kun diin may panuyo nga igdekaklarar nga deri tama an resulta han eleksyon tungod hin mga iregularidad.

Nag-alegar hi Dorado nga an Vote Counting Machines (VCM) in waray mag-ihap han mga botos nga para unta ha iya, ngan may natabo nga “substituion of voters” ha lima nga mga barangay.

Pero nagsering an korte nga waray makahimo hi Dorado nga makagpresentar hin bastante nga ebidensya basi mapawarayan-gamit an resulta han eleksyon. Igindugang pa han husgado nga bisan pa deri iglakip han pag-ihap an ginkukustyon nga mga balota, deri la gihapon ini makaka-apekto han 50% threshold han resulta.

Hi Dorado hadto nga panahon han eleksyon, in kadagmitan unta nga magpapasabot ha COMELEC ngan ha mga otoridad han iya gin-aalegar nga iregularidad basi mahipatik ini ha record han nagdudumara han mga presinto, pero waray niya ini paghimo-a, pahayag pa han korte.

Ha atubangan hini nga desisyon han RTC, an kampo ni Dorado in nagdesider nga deri pa tapos an ira pitad nga nagkukustyon han resulta han eleksyon. Subay han impormasyon, igsasampa niya an iya protesta ha Cental Office han COMELEC.

Madig-on an pagtoo ni Dorado nga mayda natabo nga “massive irregularities”. Iya gintutudlok nga mayda natabo nga linisbutay kay deri nagkakaparehas an mga pirma ngan fingerprints han rehistrado nga mga botante han lima nga barangay ngadto han mga pirma ngan fingerprints nga makikita ha Election Day Computeried Voters Lists.#(with reports from Northern Samar Provl Info Office / and Serbisyo Publiko News & Information Online)