(Photo CTTO)

Isumat.com/Enero 9, 2023

Makarimadima nga trahedya an dinangatan hin 4 katawo (ngatanan kaapi hin usa nga pamilya) han mabunggu-an hin trak an ira sinasakyan nga motorsiklo ha Caibiran, Biliran, Enero 8, 2023.

Tungod han kamakusog han katudol ha ira han trak, binawi-an hin kinabuhi an mag-asawa nga hira Jimmy (drayber han motorsiklo) ngan Soledad Agosto; ug an ira mga menor-de-edad nga anak nga hira Jameson ngan ngan Jonalyn. An mga biktima in nag-uukoy ha Sitio Tan-ag, Brgy Maurang, Caibiran.

Ginkilala an suspetsado nga drayber han trak nga hi Benigno Garcia, 31 anyos, ngan residente han Brgy Cabibihan han nasabi nga bungto.

Ha inisyal nga imbestigasyon, alas 6:20 han gab-i, an mga biktima in tipa-uli na han matabo an insidente. An Fuso Canter truck in nag-ensima hin motorsiklo ngan iya natudol an motorsiklo nga iginkakatapo kun diin sakay an mga biktima. Igin-alegar nga hubog an suspetsado kay nagtagay daw kay nakadaog ha gallera.

Nadara pa ha Biliran Provncial Hospital an mga biktima pero nagkamamatay samtang ginpapaningkamutan nga masalbar.

An drayber han trak ug an iya behikulo in aada ha kustudiya han Caibiran PNP para han kaangayan nga disposisyon. #