Isumat.com/ Disyembre 7, 2023

Upat nga high-powered firearms nga ginhipos han New Peoples Army an nakuha han militar ha tay-aw nga lugar han Brgy Maligaya, Mahaplag, Leyte hadin Enero 5, 2023.

Ha report han Philippine Army 8th Infantry Division, an mga hadto anay supporters han mga rebelde nga kumunista an nagtutdo kun diin namumutang an mao nga mga armas. Nakuha han kasundaluhan in usa nga AK-47 assault rifle, M16 rifle, M1 garand rifle, ngan M79 grenade launcher. Mayda gihapon pira ka magazines hin bala nga narekupo an mga tropa han gobyerno.

Ini nga mga armas in ginhipos han Platoon 1, Sub_regional Command Levox han Eastern Visayas Regional Party Committee han CPP-NPA.

Iginpahayag pa han report nga napwersa an mga rebelde nga iglubong an mga armas tungod kay waray higagamiti kay napakyas man hira nga maka-recruit hin bag-o nga kaapi ngan waray liwat hira makakumbinser han ira anay mga tagsuporta nga umapi han armado nga grupo.

An nagpapadayon nga pakigsumpayan han militar ngan pagpadangat han mga serbisyo han gobyerno ha mga baryuhanon an rason sanglit kulang na hin suporta para han mga kumunista, dugang pa han AFP.

Kadungan hini nga panhitabo, utro nanawagan hi Col Noel Vestuir, Commander han 802nd Infantry Brigade, ngadto han mga rebelde nga sumurender na. Sering pa niya, sarado na an suporta han mga baryuhanon ha kagi-usan kumunismo ngan angay singabuton an mga benepisyo nga iginpapahi-agom han gobyerno ha mga nasurender.

Kakulop, Enero 6, 2023, iginsumat ni Vestuir ha interview han iFM-RMN Tacloban nga mayda nala pira-pira nga squad han NPA ha Northern Leyte ngan Southern Leyte ngan ini in nagpapakita nga maluya na gud an pwersa han mao nga hugpo.#