Top 1 ha December 2022 Radiologic Technology Board Exam, Romeo M. Tejano Jr. (Photo CTTO Fb post)

Isumat.com/ Enero 6, 2023

Gin-ukoparan hin upat nga taga Eastern Visayas an pira nga pwesto ha Top 10, upod na an Numero Uno, dida han gindumara nga Radiologic Technology Board Examination hadin Disyembre 2022.

An taga Tacloban City nga nag-eskwela ha Holy Infant College of Tacloban, Inc. nga hi Romeo Miravilles Tejano Jr an nagin #1 pinaagi han rating nga 90.40. Amo gihapon ini an rating han iya igintabla ha Number 1 nga hi Andrei Buencansejo han La Consolacion University Philippines.

Waray liwat magpaperde an University of Eastern Philippines-Catarman, N. Samar kay an tulo nira nga estudyante an upod liwat ha Top 10. Amo ini hira Jhonna Mae Lobrico Enreras, 2nd placer(89.60); Keith Golondrina Canastillo, 6th placer(88.80); ngan Justine Laurence Alba, 9th placer (86.20).

An Holy Infant College in mayda liwat mga estudyante nga naka Top 10 dida han X-Ray Technologist Board Exam dida han Disyembre 2022. Amo ini an 4th placer nga hi Rosenda Costelo ug an 9th placer nga hi Krishna Marie Matoza.

Dida han Radiology Tech Exam, 1,515 an nakapasar han nag-eksamin nga 3,759 (40.30%), samtang 49 ha 263 examinees ha X-Ray Technology (18.63%) an nakapasar.

Gindumara an nasabi nga mga Board Exams hadton Disyembre 21-22, 2022 ngan iginpagawas han Professional Regulations Commission (PRC) an resulta han Enero 5, 2023. #