(FILE photo by philstar)

Isumat.com/Enero 9, 2023

Bisan ano nga paagi han gobyerno pag-warning kontra han pagpinabuto hin mga firecrackers ha panahon han Kapaskuhan ngan bag-o nga tuig, mayda la gihapon nagkakabibiktima.

Ha report han Department of Health-Eastern Visayas, walo katawo han rehiyon an nagkaada hin karamtan ha lawas kay nabuthan han firecrakers. Ini nga mga insidente in tikang Disyembre 21, 2022 tobtob Enero 6, 2023.

Ini nga ihap in hiruhitaas han una nga tuig kun diin lima la ka tawo an mga biktima.

Sumala han tagyakan han ahensya, Jelyn Lopez-Malibago, nag-eedad hin 5 tobtob 49 anyos an mga nagkabubuthan kun diin unom an kalalakin-an ngan duha an kababayen-an.

An 49-anyos nga biktima didto ha Catbalogan City in nautdan hin tudlo tungod han paburuthon, samtang an iba in deri grabe an mga kasamdan ngan nakagawas dayon ha hospital.

Iginsumat gihapon han ahensya nga waray nabiktima hin ka-igo hin bala tikang hin pagpabuto hin pusil.

Bisan kun nagtikadamo an nabuthan yana nga tuig, nalilipay an DOH kay nawara an ira pagkabaraka nga damo gud an mabibiktima tungod kay gintanggal na an Covid restrictions sanglit hayahay an katawhan han ira mga burahaton.

Ha bug-os nga Pilipinas, porlomenos 291 an ihap han mga nagkabubuthan hin firecrackers hana yana nga tuig, pahayag pa han DOH.#