Isumat.com/Oktubre 26, 2022
Nagrarayhak na liwat yana an Eastern Visayas State University (EVSU) tungod kay upat nga estudyante han unibersidad an nahilakip ha Top 10 upod na an Numero Uno dida han gindumara nga Board Examination para han Chemical Technicians yana nga Oktubre.
An taga-Tanauan, Leyte nga hi Jopette Marie Binasahan Villas amo an usa han tulo nga nanguna han eksaminasyon pinaagi han grado nga 94.00%. Amo gihapon ini nga rating an nakuha nira Carlos Concepcion han UP-Los Banos ngan Christian Rey Dela Cruz han Technological University of the Phils – Visayas.
(an topnotcher nga hi Jopette Marie B. Villas)
Duha gihapon nga tikang ha EVSU an nakatugpa ha ikatulo nga pwesto nga amo hira Kristel Grace Bensig Amistoso ngan Shaquil Aboy Sebastian bitbit an grado nga 93.00%. Hi Amistoso in taga Cabucgayan, Biliran, samtang residente naman han Borongan City, Eastern Samar hi Sebastian.
Nakatugpa naman ha ika-upat nga pwesto hi Jamaica Patrimonio Fiel nga taga EVSU gihapon, may grado nga 92.50%. Hi Fiel in taga Quinapondan, E. Samar.
Dida han kabug-usan nga 2,588 nga kumuha han eksaminasyon, 2,204 an nakapasar pahayag han Professional Regulatory Commission (PRC).
