Isumat.com/Oktubre 25, 2022
Hi Ormoc City Mayor Lucy Torres-Gomez an napili ni Presidente Bongbong Mrcos Jr nga bag-o nga mamumuno han Regional Development Council (RDC) para han Sinirangan Bisayas, subay han impormasyon tikang ha National Economic and Development Authority (NEDA).
Ini nga pagtudloka kan Torres-Gomez in nakaghatag hin sorpresa para hin damo nga tag-obserbar kay waray pili-a ni PBBM an iya patod nga hi Tacloban City Mayor Alfred Romualdez. An alkalde han Tacloban in lakip han mga nominado para han nasabi nga posisyon.
Labot la kan Torres-Gomez ngan Romualdez, an iba pa nga igin-nominar amo hira Leyte Governor Jericho Petilla, Maasin City Mayor Nacional Mercado ngan Baybay City Mayor Jose Carlos Cari.
An mga nominado an igin-endorsar ngadto ha Malakanyang pinaagi hin usa nga resulusyon tikang ha RDC nga pirmado ni NEDA Secretary Arsenio Balicasan.
An magigin Co-Chair ni Torres-Gomez ha RDC amo an tinaglawas han pribado nga sektor nga hi Leo Christian Lauzon. Hi Lauzon amo an representante ha RDC han Persons with Special Concerns. Malingkod naman nga Vice-Chair amo hi NEDA Regional Director Mylene Rosales.
Hira Torres-Gomez ngan Lauzon an magseserbe ha ira tagsatagsa nga posisyon tikang yana nga tuig tobtob 2025.
An RDC amo an institusyon nga nakikigkoordinar ngan naglalatag han dereksyon para han mga pitad pang-kauswagan han rehiyon.
Ini gihapon nga konseho an nagseserbe nga lugar kun diin ginhihisgutan an mga plano para han rehiyon basi sumubay han mga plano han gobyerno nasyuinal labi na ha larangan han ekonomiya.
Hi Torres-Gomez in aada ha syahan nga termino komo alkalde han Ormoc katapos magin tinaglawas han 4th District han Leyte ha kongreso hin tulo ka termino.#
