Isumat.com/Oktubre 25, 2022

Ka-anaw han kinabuhi hin usa nga magturutdo an mapa-it nga resulta hin argumento ha butnga han pagtagay-tagay hadin nakalabay nga adlaw ha Abuyog, Leyte.

Ha impormasyon tikang ha Abuyong Municipal Police Office, natabo an insidente ha Brgy Combis han nasabi nga bungto kun diin an biktima in ginkilala nga hi Jolito Barredo, 44 anyos, ngan usa nga maestro, residente han mao nga barangay; samtang an suspetsado amo hi Romeo Segun, 26 anyos, construction worker ngan nag-uukoy gihapon ha nasabi nga lugar.

Hi Barredo in nag-antos hin kasamdan ha wala nga parte han iya lawas sugad man ha wala nga parte han iya ulo. Gintalinguha nga madara hiya ha hospital pero pag-abot ngadto, igindeklarar han mga doktor nga dead on arrival.

An suspetsado in na-aresto Oktubre 23 ha Brgy Mahagna, Abuyong dida han gindumara nga hot pursuit operation han mga tinubyanan han balaud ngan ginsampaan na hin kaso nga murder.

Ha inisyal nga imbestigasyon, nag-iinom-inom an duha han magkaada hira hin mapaso nga balingkutay ngan diha hini, tigda nala nga ginbunobuno han suspetsado an biktima hinungdan han kamatay han maestro.#