Isumat.com/Oktubre 26, 2022
Usa nga konsehal ha bungto han Sulat, E. Samar, pira nga aktibo ha serbisyo nga kapulisan ngan anay mga pulis an nahidabi komo mga suspetsado hin panikas ha usa nga panimalay ha General Trias City, Cavite hadin Oktubre 18, 2022.
Ginkilala han Gen Trias City PNP an mga suspetsado nga hira Sulat Councilor Alvin Orenda, ex-PNP members Franklin Menod ngan John Carlo Machon, PLt Reynald Afable ngan duha pa nga police corporals.
Sumala kan LtCol Jose Naparato, Chief of Police han nasabi nga syudad, hadton gab-i han Oktubre 18, ginsulod hin mga kalalakin-an an balay han pamilya han biktima. Gingapos ngan ginkastigo pa an padre de pamilya han panimalay.
Nakuha han mga tikasan an pusil han biktima sugad man an ira vault nga may sulod nga mga alahas balor hin tunga hin milyon ka pesos.
An insidente in nakit-an ha CCTV ngan subay han testimonya han mga biktima, natudlok han mga otoridad kun hira hin-o an mga tikasan ngan nagdumara hira hin hot pursuit operation.
Kataliwan hin tulo ka adlaw, syahan nga na-aresto ha Quezon City an mga pulis nga nadismis ha serbisyo ngahira Menod ngan Machon. Nakuha tikang kan Menod an pusil han biktima ngan pira nga mga alahas tikang kan Machon. Nagsering an biktima nga ini nga mga ex-pulis in iya anay mga kaupod ha serbisyo.
Iginpahayag pa ni LtCol Naparato nga igin-asoy ni Machon nga mayda pa hira siyam nga kaupdanan lakip na hira konsehal Orenda ngan Lt Afable. Sering daw ni Machon, didto hira nagplano han krimen ha balay han konsehal ha Dasmarinas City, Cavite.
Nadakop gihapon an drayber han back-up car dida han panikas ug ini nga drayber in nagtudlok kan Orenda nga nadadabi han krimen. Ginkumpirmar naman han kapulisan nga ini nga back-up car in gingamit hin pan hold-up ha Alabang hadton Hulyo 2022.
Ha follow-up operation han mga kapulisan, an mga parte han gin-guba nga vault in nakit-an harani han balay han konsehal ngan may CCTV footage nagpapakita nga igingagawas tikang ha balay han konsehal in usa nga vault.
Dida hin usa nga balita tikang ha Cavite Media, nagpadara na daw hin komunikasyon an konsehal ha mga imbestigador kasumpay han iya pagsurender.
Hi Lt Afable in aada na yana ha kostudiya han mga otoridad pero nahisumat nga aadto hin usa nga hospital kay nag-pruweba hiya paggutgot han iya li-og pinaagi hin gunting han gumawas an notisya nga nahilambigit hiya han insidente.
Ini nga panhitabo in nahinotisya gihapon ha telibisyon kagab-i, Oktubre 25, 2022 pinaagi han Frontline News ha TV5.#
