(Image CTTO)

Isumat.com/Oktubre 26, 2022

Nag-warning ha publiko an Food and Drug Administration (FDA) nga deri gud magpatumar hin upat nga brands hin syrup ha kabataan para han ubo ngan sip-on kay magdudurot ini hin seryoso nga sakit ha kidney ngan makamaratay.

Iginpahayag han FDA nga hadin Oktubre 5, 2022, an World Health Organization (WHO) in nag-warning kontra han pagpatumar han nasabi nga mga medesina kay ini in kontaminado hin mga kemikal nga makahirilo ha tawo.

Ini nga mga brands in hinimo han Maiden Pharmaceuticals Limited nga nakabase ha New Delhi, India. Amo ini an Promethazine Oral Solution BP, Kofexmalin Baby Cough Syrup, MakOFF Baby Cough Syrup ngan MaGrip n Cold Syrup.

Ini nga mga medesina in deri rehistrado ha FDA, sanglit deri puede ig-prescribe ngan igbaligya ha Pilipinas. An problema kun may makalusot hini nga mga produkto tisulod ha Pilipinas pinaagi han smuggling ngan mahibaligya ha publiko.

An FDA in nagsering nga an nasabi nga mga brands in kontaminado hin diethylene glycol ngan ethylene glycol nga nakakahilo han tawo. Ini nga mga kemikal in ginagamit ha paghimo hin pintura, plastic ngan cosmetics.

Magreresulta ini hin paglipong han ulo, pagsinuka, paghimakuri pag-ihi, ma-ul-ol an ulo, ngan acute kidney injury nga puede magin kawsa hin pagkamatay, sumala han WHO.

Antis ini nga warning han WHO, iginderi ha Indonesia in damo nga klase hin cough syrup nga deri rehistrado tungod han pagkamatay hin 99 nga kabataan ngan pagkaada hin acute kidney injuries hin sobra 200 nga kabataan.

An WHO in nakadiskubre gihapon pinaagi hin usa nga pag-istudyo nga sobra 70 nga kabataan ha nasud Gambia, West Africa nga nakatumar han mao nga mga brands an naawat an kinabuhi tungod han grabe nga kadistroso han ira kidney. # (via Cebu Daily News)