Isumat.com/2:53PM,June 23,2020
Waray kamanduan para hin lockdown ha syudad han Tacloban sugad man waray gihapon kamanduan nga nagdederi nga sumulod ha Tacloban an mga mulopyo tikang ha iba nga bungto nga mayda nagkatatapnan han COVID-19.
Ini an ginklaro ni Mayor Alfred Romualdez dida han iya pakig-istorya han mga kaapi han media yana nga kulop(Hunyo 23). Nagsering hi Romualdez nga hapagkayana, harayo an posibilidad nga igbutang ha lockdown an Tacloban bisan kun pira na nga health workers nga residente han syudad an COVID Positive. Iya ginklaro nga maupay an panlawas hini nga mga nagpositibo ngan tobtob yana, negatibo an resulta han haros 99 porsyento han ira miembro han pamilya nga gin-swab test.
Iginsumat han amay han syudad nga an natatabo yana amo an pag-lockdown hin partikular nga parte hin barangay kun diin mayda nagpositibo basi magdumara hin contact tracing, ngan katapos hini, ginbubulkas an lockdown.
Kasumpay naman han mga sumat-sumat nga deri na ginpapasulod ha Tacloban an mga taga Tarangnan ngan taga Basey, mahugot nga igindiwara han alkalde nga mayda palisiya nga “No Entry” para ha ira. Sumala kan Romualdez, waray niya kasugu-anan kaparte hini, ngan waray liwat niya nasasabutan nga may kamanduan an DILG hini nga travel ban.
Ginhahangyo la niya para han mga residente han mga lugar nga damo na an natapnan han virus nga kun mahihimo deri magbiyahe ngadi ha Tacloban kun deri importante an tuyo. Sering pa niya, ngatanan nga taga Eastern Visayas in puede pumakadi ha Tacloban basta seguraduhon la nga importante an tuyo, magsusunod han health protocols ngan deri sudoy-sudoy ngan yasyas la nga pagbiyahe.
Kun manunumduman, pira na beses nga nagsarang ha social media nga magla-lockdown an Tacloban, ug kagab-i lumutaw liwat an hurob-hurob nga deri na daw papasudlon ha Tacloban an tikang ha Basey ngan Tarangnan kun diin may natabo nga local/community transmission han corona virus.
Hi Romualdez in nagsayod nga waray hini kamatuoran, an importante la nga doblehon an paghirot. Nanawagan gihapon hiya ha mga health workers ngan nagdudumara han ambulansya han iba nga bungto nga kun pumakanhi hira ha Tacloban, deri na magparupasyada ngan mag-grocery katapos han ira tuyo ha hospital ngan deretso na bumalik kun tikang man hira diin nga lugar.
Hapagkayana, umabot na ha 54 ka tawo an mga residente han Tacloban nga nadarahigan han virus ug maabot hin 20 ha ira in nagtatrabaho ha EVRMC. Waray naman nahireport nga natapnan nga medical personnel han City Health Office ngan Tacloban City Hospital. #
