Isumat.com/Mayo 26, 2023
Natudlok ngan nakilal-an na han mga otoridad kun hin-o an suspetsado han brutal nga pagpatay hin duha nga senior high school students ha Pambujan, Northern Samar hadton Mayo 21, 2023.
An Pambujan Municipal Police Station in nagkilala han suspetsado nga hi Nelvin Lambino Atencio, 22 anyos, drayber hin pedicab, may ka live-in partner, ngan nag-uukoy ha Brgy 1, Poblacion, Pambujan. Hiya in may mga alyas nga Imben, Nonoy ngan Enteng.
Hinsabutan nga labot la han iya kalambigit hini nga panmatay ha Pambujan, hi Atencio in ginkasuhan hin Illegal Posesion of Firearms and Ammunitions han una nga tuig pinaagi han San Roque Police Station.
Hapagkayana, an suspetsado in waray pa kadadakop ngan padayon ginhahalpat han kapulisan. Waray na gihapon makit-i ha ira puy-anan an iya iginkakalungon nga babaye.
Hadton pasado alas 2 han kulop, Mayo 21, an mga biktima nga hira Rommel Balasta ngan Zende Lobos, parehas estudyante han Pambujan National High School, an pinanmuno samtang namamasyada ha Sitio Bay-ad, Brgy 1, Poblacion Pambujan. #
