Isumat.com/Mayo 29, 2023
Ha syahan nga pag-api hin torneo tikang mahimugso an Aktibong Basketbolista Development Academy (ABDA) nga nakabase ha Tacloban City, an mga batan-on nga players han grupo in nakagdara dayon hin onor han maka-angkon han 1st Runner-up an duha han ira teams ha katatapos pala nga Mac Tallo MT 3×3 Summer Cup ha Cebu City.
Bisan kun mga beterano na ha 3×3 basketball ngan hiruhigtaas ngan darudagko an mga players han Cebu teams, waray magpatarantar ngan nagpakita hin abilidad an mga pambato han ABDA.
An U17 Team 1 han ABDA an nagin 1st Runner-up ha ira kategorya kun diin ira iginka-asdangay ha kampeonato an Team CEC. An grupo han ABDA in ginkokomponer nira Mark Kennyvic Talengdon, Patrick Robert Gallano, Stephen Andre Abayan ngan Thomas James Price.
Dida han U14 Division, nakaplagan han ABDA an 1st Runner-up ug ini amo hira Gabriel Cabibihan, Prince Jan Poticano, Maurice Pestano ngan Enzo Lauron.
Nakiglantugi gihapon an ABDA U17 Team 2 nga gin-apihan nira Sean Michael German, John Lloyd Pontila, Mac Kean Fresto ngan John Asaldo, pero waray hira makadangat ha finals.
Dida hini nga torneo ha Cebu, gin-updan hira han mga coaches nga hira Noli Cabibihan, Nonelon De Paz, Peter Calumpiano, ngan Pepen Denzon sugad man ni Jenssen Loyola nga amo an Strength & Conditioning coach.
Hi Julius Ross Lacaba nga amo an namumuno han ABDA in mapaso nga naglamanano ngan hul-os an pagsaludo han ira mga teams nga nagpasundayag han ira talento ngan abilidad dida han kompetisyon.
An ABDA in may panuyo nga buligan an batan-on nga mga atleta ha aton dapit nga makab-utan an tim-os nga potensyal basi magin andam hira ha higtaas nga pantag hin kompetisyon. Ini in pinaagi han kumpleto ngan sustenado nga training program nga gindisenyo hin mga beterano nga coaches ngan technical staff.
Gintatagan gihapon hin prayoridad han ABDA nga magin maupay nga mga estudyante ngan masinugtanon nga mga mulopyo an mga batan-on nga nagpapa-ilarum han training program. #
