Isumat.com/Mayo 23, 2023
Mahugot nga nananawagan para hin hustisya an pamilya han mga biktima, upod an lokal nga pamunuan ngan mga bungtuhanon ha Pambujan, Northern Samar ha brutal nga pagpataya hin duha nga senior high school students ha nasabi nga munsipalidad hadin Mayo 21, 2023.
An LGU-Pambujan ha panguna ni Mayor Eping Sosing in nagkondenar han pagpataya han mga biktima nga hira Rommel Balasta ngan Zende Lobos nga mga estudyante han Pambujan National High School.
An LGU in nag-opreser hin reward money nga 50 Mil pesos para han makakagtutdo han nagpapaluyo han makangingirhat nga krimen nga natabo ha Brgy 1, Poblacion, Pambujan kun diin pinanmuno an mga biktima hinungdan han ira kamatayon.
Dida han nahikay nga impormasyon han IsumatNews, an mga biktima in mag-oyab ngan pasado alas 2 han kulop han Mayo 21 hira in namasyada ngadto han lugar nga tinatawag nga Lu-ok nga sakop han nasabi nga barangay.
Samtang magka-upod an mga biktima, an suspetsado/ o mga suspetsado in dumaop ngan ginbunobuno hira ngan iginlabog ha dagat an ira mga lawas. Hi Zende in nadara pa ha hospital han mangirisda nga nakakita ha iya pero naawat an kinabuhi samtang gintatambal.
Hi Rommel nga dako an kasamdan ha ligid nga parte han hawak in namatay ha lugar han insidente.
Tobtob han ginsusurat ini nga notisya, waray pa katutudlok an pangilal-an ngan waray pa kadakop an mga suspetsado han krimen.
An mga mulopyo han bungto in nalulukupan yana hin pagkabaraka tungod nga waray pa kasisikmit an mga gintatahapan.
An IsumatNews in naningkamot pagtawag ha telepono han Pambujan Police Station pasado ala 1 han kulop,Mayo 23 para makahikay hin kadugangan nga impormasyon, pero waray personales nga nabaton han tawag.
An magkalainlain nga sektor ha Pambujan in nagbuburublig han panawagan nga magka-urusa an ngatanan basi masolbar ini nga krimen ngan makab-utan han mga biktima an hustisya.#
