Isumat.com/Mayo 22, 2023
Nag-antos hin mga injuries in kadam-an nga pasaheros han Supercast M/V Judiel han igkabangaay an nasabi nga fastcraft hin usa nga cargo ship ha Mactan Channel kakulop, Mayo 21, 2023.
Subay han report han Cebu Philippine Coast Guard, an Supercat nga may 185 nga pasaheros in lumakat ha Ormoc pasado alas 12 han udto ngan nakatalaan umabot ha Pier 1, Cebu City alas 3 han kulop.
Samtang harani na ha Mandaue-Mactan Bridge an fastcraft, sumampak an too nga parte hini ha iginkakatapo nga M/V Poseidon cargo vessel.
Tungod han kamakusog han bangaay nanhilabog tikang han ira mga lingkuranan an kadam-an nga pasaheros samtang an iba in nagkatutumba ngan nanhirantok. Nagkatatanggal gihapon an pira nga lingkuranan ha fastcraft.
An IsumatNews in nakasagap hin impormasyon nga nag-aberiya an steering wheel o manibela han Supercat, sanglit waray na makontrol an pagliko hini tipawala sanglit iginkasampakay ha cargo ship.
An too nga parte han fastcraft an bumunggo ngadto han cargo vessel.
Kadagmitan nga gintagan hin atensyon medikal an mga pasaheros han supercat han makadangat an sarakyan ngadto han pantalan.
An Supercat Corporation in nangaro hin pasaylo ngadto han ngatanan nga apektado han insidente. Ira iginpatapod nga nakikigsumpayan hira ha iba nga ahensya han gobyerno ha imbestigasyon han panhitabo.
Nagpahayag gihapon an korporasyon nga maghihimo hira han kaangayan nga mga pitad basi deri na utro matabo ini.
Tobtob han ginsusurat ini nga notisya, an coast guard in waray pa magpagawas hin opisyal nga pahayag.
