Isumat.com/Hulyo 25, 2021
Mabug-at nga personal nga problema an gintutudlok nga rason hin usa nga kaapi han Philippine Army nga nakagduso pagtiwas han iya kinabuhi ha Calbiga, Samar hadin nakalabay nga adlaw.
Dida han impormasyon nga nahikay han Isumat.com, an biktima in ginkilala nga hi Pvt 1stClass Robert Mhel Labro, 28 anyos ngan residente han Brgy 6 han mao nga bungto. Hi Labro in may ka live-in partner, may duha nga anak, ngan nakadestino ha 20th Infantry Battalion ha Northern Samar.
Banda alas 2 han kulop han madiskubre han bugto han biktima nga nabitay an lawas ni Labro ha alkoba han ira balay pinaagi hin paghigot hin nylon ngadto han iya liog. Gintalinguha pa nga madara na Rural Health Unit an sundalo pero nadeklarar ini nga dead on arrival.
Sumala pa han impormasyon, mayda mabug-at nga isyu ha butnga nira Labro ug han iya kalungon nga babaye. Mayda mga panahon nga nag-aaway hira ngan umabot ha punto nga naghulga na an biktima nga papatayon niya an iya ka live-in.
Nahisumat pa nga han gab-i antis an panhitabo, ginpinamiling han biktima an iya partner. Kinabuwasan, nadiskubre nala nga naghikog na an biktima didto mismo han ira balay. #
