Isumat.com/Hulyo 29, 2021
Iginpatapod han liderato han University of Eastern Philippines (UEP) ha Northern Samar nga mapapatukan han kaangayan nga sirot an hin-o man nga mapapamatud-an nga mayda baratunon han pag suicide hin usa nga estudyante han unibersidad.
Hi Dr. Cherry Ultra, Presidente han UEP, an nagpahayag nga nagtukod na hira hin grupo nga maghihimo hin mahugot nga imbestigasyon basi gumawas an tinood nga mga hinungdan han pagpakamatay hin lalaki nga Criminology Student han eskwelahan.
Igin-aalegar nga an estudyante in duro an kabido nga waray na daw hiya tagi hin konsiderasyon hin duha nga mga maestro bisan kun nanginyupo hiya nga magkaada hiya hin tsansa nga makag-submiter han answers han eksaminasyon.
Subay han mga impormasyon, na-atrasar daw hin pira ka minutos an pag-submit han estudyante tungod han kamakuri han internet signal, ngan ini in waray na igkonsiderar han mga maestro.
Nagpatapod hi Ultra nga magigin patas an imbestigasyon ngan maagi ini han “due process” ngan kun maprobaran nga may kasaypanan an igindadabi nga faculty members, magpapalusad an unibersidad han kaangayan nga sirot.
Igindig-on gihapon han opisyal nga tungod han natatabo nga pandemya, nagpasarig an unibersidad nga hihimoon an ngatanan basi ma-intindihan an sitwasyon han mga estudyante pinaagi han tagline nga “No one shall be left behind.”
Ha luyo nga bahin, nag-esplikar naman an usa nga instructor nga nahidadabi han insidente pinaagi han iya post ha facebook nga nagpapahayag nga naghatag hiya hin instructions ha mga estudyante nga mayda pa tsansa an deri makaka submit han igintalaan nga oras. Iya pa ngani iginsumat nga magkaada pa hin utro nga eksaminasyon an waray makapasar han naha-una nga examination. #
