Isumat/com/Hulyo 29, 2021
Usa nga empleyado han Department of Education ha Eastern Samar an naglugaring pag-utod han iya kinabuhi kakulop, Hulyo 28, ha bungto han Balangiga.
Dida han report han PNP, ginkilala an biktima nga hi Mc Roland Adula, 26 anyos, waray asawa, maestro ha elementarya ngan nag-uukoy ha Brgy San Miguel han nasabi nga munisipalidad.
Subay han report, pasado alas 7 han gab-i han makakarawat hin impormasyon an PNP Station hin gin-aalegar nga nagpakamatay ha Brgy Maybunga. Hi Adula upod an iya oyab ngan iba pa nga mga magturutdo in temporaryo nga nag-uukoy didto han eskwelahan tungod kay hirayo ini ha poblacion.
Pasado alas 3 han kulop, nagkaada hin pagkabalingkutay an biktima ug an iya girlfriend didto han classroom. Kataliwan han argumento, pumakadto hi Adula han kusina. Paghagos hin pira ka minutos, sumonod ngadto an iya oyab ngan iya nala nakit-an nga nabitay na an lawas ni Adula pinaagi hin paghigot hin nylon nga pisi ngadto han alkoba.
Nangaro hin bulig an oyab han biktima ngan kadagmitan gindara ngadto han hospital ha bungto pero gindeklarar hi Adula nga dead on arrival.
Dida han inisyal nga imbestigasyon, posible nga motibo han pagpakamatay amo an dako nga problema pinansyal an maestro. Hinsabutan nga damo an iya utang ngan naka-prenda an iya ATM card. #
