Isumat.com/Agosto 24, 2022
Tigda nga nagin sikat ngan sentro hin iru-istorya yana an taga Ormoc nga hi Trishamae Barquio han mangaro hiya hin pasaylo ha publiko tungod han pag-post niya ha Facebook nga may natabo nga kidnapping ha Ormoc kakulop, Agosto 23, 2022.
Hi Barquio in aminado nga nag-panic hiya han makabati kakulop han gab-i han iru-istorya han iya mga amyaw mahitungod hin tawo nga ginsikmit.
Sumala ha iya, an iya intensyon unta amo an pag-warning ha iba nga maghirot tungod han panhitabo, pero nakasantop hiya nga waray ngay-an klaro kun tinood gud man nga may natabo nga kidnapping ha Cogon, Ormoc City.
Hiya in naghangyo nga ig-delete an mga nag-screen shot han iya “kidnapping post” ngan nangaro hin pasaylo tungod han kabaraka ngan kalisang nga igindurot han iya post.
Sering pa niya ” Sorry kaayu sa tanan, Please Spread This Post.”
Samtang, yana nga adlaw, Agosto 24, 2022, hi Col Jean Fajardo, tagyakan han Philippine National Police in nagpahayag nga subay ha record han PNP, waray white van nga nagpipinansikmit hin katawhan ha bisan diin nga parte han nasud.
Sumala kan Fajardo, waray nakapatik ha bisan ano nga record han PNP mahitungod hin busag nga van nga kunuhay amo an ginagamit pagkuha hin katawhan.
Nag-esplikar an opisyal nga may natatabo nga nagkakawagra nga tawo, pero iba-iba an motibo han krimen ngan waray nadadabi nga white van.
Iginpatapod gihapon ni Fajardo nga an kapulisan in naka-alerto basi kadagmitan maka-responde ha bisan ano nga panhitabo. #
