Isumat.com/Agosto 25, 2022
Iginplastar na han Commission on Elections an mga petsa nga igintalaan para han opisyal nga mga aktibidadis kasumpay han ti-arabot nga Barangay ngan Sanguniang Kabataan Elections hiton Disyembre 5, 2022.
Ginbuhat ini han COMELEC basi magin andam an publiko bisan kun may pira nga balaudnon nga iginpasaka ha kongreso may panuyo nga ig-ugsod an pinili-ay ngadto ha sunod nga tuig.
Adi an Calendar of Activites han COMELEC:
Setyembre 2022: Pag-Imprinta han mga Balota
Oktubre 2022: Pagpadara han Balota ngan mga Higamit ha mga Probinsya
Oktubre 6-13, 2022: Pag-file han Certificate of Candidacy
Nobyembre 25-Disyembre 3, 2022: Campaign Period
Disyembre 5, 2022: Election Day
Disyembre 12, 2022: Pagtapos han Election Period.
Iginpahayag han COMELEC nga hingpit an ira pangandaman labi na kay waray pa man balaud nga magbabag-o han petsa han piniliay. Igindig-on han ahensya nga ira susundon kun ano an iginlalarang han mga probisyones han Republika Akta 6646 ngan 6679 kaparte han pagdumara hini nga eleksyon.
Hi COMELEC Chairman Erwin Garcia in nagpahayag na hanhadi nga para han COMELEC, kinahanglan madayon yana nga Disyembre an eleksyon kay imbes nga makakatirok an gobyerno hin pondo, madudugangan lugod ini hin 5 Bilyon pesos nga gastos kun sunod pa nga tuig ini paghimoon.#
