Isumat.com/ Marso 22, 2023

Mayda posibilidad nga magmenos an kabaraydan han kuryente ha probinsya han Samar tungod han pagtitindugon nga Solar power plants ha duha nga kooperatiba han elektrisidad dida han mao nga lalawigan.

Ini an iginpahayag han SAMELCO I ngan SAMELCO II, an duha nga electric cooperatives ha Samar, kataliwan la nga mapili hira nga makaka-agom tag 1 Milyon pesos Europian Union Grant ha ilarum han programa nga Sustainable Energy Program – Rural Network Solar han World Bank.

Ha notisya han Philippine News Agency, an duha nga solar power plants in magbubunga hin kadugangan nga suplay hin kuryente nga 2-megawatts. Tungod hini, puede humabubo an taripa han elektrisidad nga ginbabaydan han mga kunsumidor.

Sumala han mga nagdudumara han duha nga electric cooperatives, an kuryente tikang han solar power plants in deri na maagi ha transmission lines han National Grid Corporation of the Philippines, sanglit waray transmission charge.

Bootsidngon, an kuryente tikang han solar power plants in barubarato ngan ini in makakagpahabubo han kabaraydan ha elektrisidad. Madudugangan gihapon an kapasidad han mga kooperatiba ha pagsuplay hin kuryente ngadto han ira nasasakupan.

Samtang, nagkamay-ada naman hin pagpirma hin Memorandum of Agreement (MOU) ha butnga han LGU-Borongan City, Catholic Relief Services (CRS) U.S. Agency for International Development (USAID) ngan Rocky Mountain Institute (RMI) basi matuman an “Pilot Renewable Energy Project” han syudad.

Subay han report han Borongan City Information Office, natabo an seremonyas hadin nag-agi nga semana kun diin presente hira City Mayor Jose Ivan Dayan Agda ngan mga tinaglawas han nasabi nga mga ahensya.

Nagsering hi Agda nga pinaagi hini, magigin kamatuoran an maiha na nga inop nga magkamay-ada hin kalugaringon nga surok hin kuryente an syudad pinaagi hin Hydroelectric power plant. Ini nga proyekto an plano igpresentar ni Agda ha RMI nga kabuligan hira.

Nag-esplikar an alkalde nga kinahanglan mahipakita han mga LGUs nga akos nira an sugad hini nga mga proyekto pinaagi han pakigbinuligay ha mga organisasyon sugad han CRS ngan RMI.

Kun ma-implementar ini, an Borongan City in magkakamay-ada hin bastante nga elektrisidad nga ginkikinahanglan basi masusteneran an panginahanglan han kuryente labi na an industriya han turismo.

Gintitinguha han syudad nga magin tourism hub ha isla han Samar ha masunod nga duha ka tuig. Dako hin duro an malala-uman nga pagtukod hin mga negosyo ha Borongan City kun matuman ini nga proyekto, pahayag pa ni Agda. #