Isumat.com/ Marso 22, 2023
Ha panuyo nga mapakusog utro ngan hul-os nga makatukdaw an industriya han turismo han rehiyon, an Department of Tourism in magdudumara hin paghag-id nga papartisiparan han mga ‘tourism frontliners’ han Eastern Visayas.
Hi Tourism Regional Director Karina Rosa Tiopes in nagpasamwak nga an ira ahensya in nagtatarget hin 6, 400 nga tourism frontliners ha Rehiyon Otso nga ma-atender han serye hin mga trainings basi madugangan an ira kina-adman ngan kapasidad ha larangan han turismo.
Dida han syahan nga tulo ka bulan han 2023, sobra na hin usa ka yukot nga frontliners han turismo ha Sinirangan Bisayas an nag-agi han nasabi nga training, sering pa ni Tiopes.
Ini nga aktibidad in tinatawag nga Filipino Brand of Service Excellence Training. Ginhihingita hini nga programa nga mahipakita gud an Filipino Brand of Hospitality o pagkarawat ngan pagserbe hin tim-os ha mga bisita nga napasyada ha aton lugar.
Ginhimo nga pananglitan ni Tiopes an engrande nga eksperiensya han mga langyawanon nga turista nga sakay han Luxury Ship nga pumakadto ha Kalanggaman Island, Palompon, Leyte hadin nag-agi nga bulan. Dida han mao nga aktibidad, ginseguro han LGU-Palompon, Department of Tourism ngan mga kasugbong nga sektor nga deri gud makakalimtan han mga turista an madagaang ngan maribhong nga ira natagamtaman.
Sering pa han opisyal, kinahanglan matilawan han mga turista an istilo han mga taga Sinirangan Bisayas ha pag-estimar ngan pagtimangno ha mga bisita.
Dida han nasabi nga aktibidad, iginpakita han mga frontliners ha Palompon an paagi han Mabuhay Greetings . Sumala kan Tiopes, ini nga “Mabuhay Greetings” an kinahanglan hibaru-an gihapon han iba pa nga tourism frontliners ha bug-os nga rehiyon.
Aminado hi Tiopes nga deri pa hul-os an pagbakdaw han turismo ha Region 8 tungod han epekto han pandemya, pero malina-umon hiya nga mahibabalik utro an kamabakod ngan kamaribhong han turismo ha aton dapit ha masunod nga pira ka tuig.
Ginklaro gihapon ni Tiopes nga madepende ini han preparasyon han tourism sites, pagigin andam han frontliners, ngan promosyon han turismo basi magka-ada hin interes an mga turista.
An promotion han Eastern Visayas komo tourism and travel destination in responsabilidad han gobyerno, mga LGUs, ug han publiko kay kun nagigin produktibo ini nga industriya, dako an bulig hini ha panginabuhi han katawhan, pahayag pa han Tourism Regional Director. #
