Isumat.com/ Marso 23,2023

Kasering hin usa nga estudyante nga waray makakabuksot han iya bisyo, nagsayop lugod hiya han ma-aktuhan nga nagamit han igindederi nga droga ha comfort room hin usa nga mall ha Marasbaras, Tacloban City, hadton Marso 21, 2023.

Ha report han PNP-Regional Office, ginkilala an suspetsado nga hi Jedd Clifford Santiso, 22 anyos, waray asawa, estudyante ngan taga Brgy Hupit, Alangalang, Leyte.

Ha imbestigasyon han kapulisan, hadton alas 11:20 han aga hito nga adlaw, an mga security guards han nasabi nga mall in nagdudumara han ira inspection palibot han establisemento. Sumulod an mga gwardya han CR ha ground floor han establisemento ngan didto nira na-aktuhan nga nagamit han gin-aalegar nga droga an suspek.

Hi Santiso an ginkapkapan han mga sekyu ngan nakuhaan pa hiya hin pitaka nga may sulod nga tulo ka sachet hin gin-aalegar nga marijuana.

An nasabi nga suspetsado in kadagmitan igintubyan han mga security guards ngadto ha Police Station 1 han Tacloban City Police para han kaangayan nga disposisyon.

Samtang, ha iba naman nga balita kasumpay han illegal drugs, namatay an usa nga drug personality han umato ini ha mga otoridad nga mag-aaresto ha iya dida hin buy-bust operation ha Brgy Poblacion, Merida, Leyte, Marso 21, 2023.

Ginkilala an namatay nga hi Rodcir Maraviles, nag-uukoy ha Brgy Libertad, Ormoc City, ngan gintutudlok nga Number 2 Regional Drug Priority Target han PNP ngan PDEA Eastern Visayas.

Ha impormasyon tikang ha PNP Regional Office, an poseur-buyer nga pulis in syahan nakapalit hin usa ka sachet hin gin-aalegar shabu tikang han suspek kantidad hin 30 Mil pesos.

Dida hini, naka-abat hi Maraviles nga pulis an iya ka-transaksyon sanglit tigda hiya bumunot han iya armas, pero naha-una pagpabuto an mga otoridad ngan naigo ha magkalainlain nga parte han iya lawas an suspetsado.

Dead on arrival ha Ormoc District Hospital hi Maraviles han pagdad-on hiya ngadto katapos han insidente. #