Isumat.com/ Marso 23, 2023

Samtang gin-aabat na an nagtitikapaso nga temperatura kay summer season na, level-up an pagparaso dida hiton Domingo, Marso 26, 2023 an aantuson han mga residente han Tacloban City, Palo ngan Babatngon, Leyte.

Ini an mga lugar nga nasasakop han area coverage han LEYECO II kun diin nag-eskudyul hin POWER INTERRUPTION an National Grid Corporation of the Philippines (NGCP) hito nga petsa.

12-oras an waray suplay han kuryente an mao nga mga lugar, tikang alas 6 han aga tobtob alas 6 han gab-i.

Nagsering an NGCP nga magliliwan hira hin mga poste ngan mga ekipahes ha Babatngon-Arado 69kV Line, sanglit paparungon anay an elektrisidad.

Kun manunumduman, igin-eskdyul ini nga brownout hadton Marso 12, pero waray madayon tungod kay may importante nga aktibidad in usa nga ahensya han gobyerno hadto nga adlaw.

An waray mga generator, pag-andam han abaniko ngan halaba nga pasensya…..para han may mga generator, ada kay masering nala kami nga SANA ALL !

Para han mapakadto ha mga baybayon pagpatugnaw, bantayi gud hin maupay an mga kaupdanan labi na an kabataan basi kalikyan an kalumos ngan iba pa nga peligro.