Isumat.com/ Marso 23, 2023

Bisan kun nagsasapin-sapin na an nadag-an nga mga korona ngan titulo ha larangan han Beauty & Brains Competitions, an taga Eastern Visayas nga beauty titlist Gabrielle Camille Basiano in deri pa nagsasara han iya kalugaringon nga makigpa-isan-isan ha mga beauty pageants ha maabot nga mga panahon.

Ha artikulo han Phil Daily Inquirer, nagsumat hi Gab nga katapos han sunod-sunod nga pag-api niya ha mga pageants, tatagan niya hin bakasyon an iya kalugaringon.

Sumala ha iya, kinahanglan magkamay-ada hiya hin “break” tikang ha mga kompetisyon, pero iya ginklaro nga iya pa pagtitirutimbangon kun makikiglantugi pa hiya ha mga kompetisyon ha maabot nga mga adlaw. Sering pa ni Gab, “I’m not closing my doors.

Kun manunumduman, hi Basiano an nag-representar han Pilipinas ha Miss Intercontinental 2022 ha Egypt hadton Uktubre kun diin nahilakip hiya han Top 20 Semifinalists.

Antis hini, hadton 2018 umapi hiya han Miss Earth Philippines kun diin iya ginrepresentaran an Tacloban City. Hiya in nahi-upod han Top 18 Semifinalists dida han contest.

Hadton July 2019, hi Basiano an nakoronahan nga Miss Friendship International didto ha Chengdu, China. Antis hiya pumakadto ha China, hiya an napili nga Philippines First Ambassador for Tourism.

Durante han BB Pilipinas 2021, hiya an napili nga 1st Runner-up ngan nakadaog han Best in Long Gown.

Bumalik hiya pag-api han BB Pilipinas 2022 ngan nanaglawas hiya han Borongan City. Dida han kompetisyon, hi Gab an napili nga BB Pilipinas-Intercontinental ngan nadara an mga tropeo ha Best in Swimsuit ngan Best in Evening Gown.

Labot la han mga titulo ha beauty pageants, hi Basiano in sagipo gihapon han iya trabaho komo modelo.

Yana nga summer season, plano ni Gab nga umuli ngan magbakasyon ha Borongan City, an lugar ni iya Mommy Mary. Hi Intoy Basiano nga tatay ni Gab in taga Tacloban City. Sering pa niya, “perfect summer getaway” an ira pwesto ha Borongan kay adto gud ini namumutang ha kabaybayunan.

Iya ginhihingita nga igka-urusa utro an iya mga paryente ngan kasangkayan ha Borongan yana nga summer.

Kasumpay hini, nagsumat hi Gab nga mabulig hiya pag-promote han Borongan labi na kay nagtitikabantog na an syudad nga tourist destination.#