Isumat.com/8:55AM, July 13, 2020
Padayon nga ginlalapingka han pandemya han COVID-19 an ekonomiya han bug-os nga kalibutan ug ini in gin-aantos gihapon ha Rehiyon Otso.
Dida han iginpagawas nga impormasyon han Philippine Statistics Authority, dida han Abril 2020, umabot ha 250 Mil katawo ha Eastern Visayas an nawarayan trabaho. Ini in tungod han pagsara ngan pagsuspender han mga operasyon hin mga kompaniya ngan establisemento. Ini in epekto gihapon han lockdown nga iginpasunod.
Subay pa han report, sobra pa hin triple an porsyento han paghitaas han unemployment rate ha Region 8. Han Abril 2019, 4% la an unemployment rate, pero han Abril 2020, sumikad ini ha 14.3% .
Tungod hini, dida han 17 nga rehiyon ha Pilipinas, nag-iikalima an Region 8 han listahan han unemployment rate.
Ginkakabarak-an naman han mga ekonomista nga mahitaas pa ini nga numero kun magpaka-uli na ngatanan an Locally Stranded Individuals ngan kun igpadayon an Balik-Probinsya Program tungod kay deri man segurado nga makakabiling hira hin trabaho ha aton rehiyon. #
