(Photo CTTO)

Isumat.com/Abril 19, 2023

Dako nga kalbaryo an pag-aantuson hin 219 nga pamilya nga naugbaw an mga puy-anan han dako nga sunog han maagahon, Abril 18, 2023 ha Brgy Carmen ngan Brgy Obrero, Calbayog City.

Ha pahayag ni Mayor Monmon Uy han nasabi nga syudad, tatalinguhaon han lokal nga pangobyernuhan nga katagan hin kadagmitan nga ayuda an sobra 900 nga indibiduwal nga apektado han kalamidad.

Partikular nga gintututukan yana han LGU-Calbayog kun hain an temporaryo nga uukyan han mga nasunugan sugad man an ayuda pinansyal para ha ira.

Ha inisyal nga imbestigasyon, pasado alas 3 han maagahon nagtikang an kalayo ha balay nga gintatag-iya ni Mitzly Jalalon nga gin-uukyan yana ni Atos Catalan. Madagmit an paglarab han kalayo tungod kay an kabablayan didto han lugar in hinimo ha mga materyales nga madagmit magdukot.

Ginbabanabana han Bureau of Fire Protection nga kantidad hin 3 Milyones pesos an nagin abo nga mga propyedad. Waray nahireport nga nag-antos hin injuries o namatay dida han insidente.

May impormasyon nga nagtikang an kalayo tungod kay nag-away in mag-asawa dida han lugar, pero ginpipiripikar pa ini han mga imbestigador.

Hinsabutan gihapon nga kadam-an han nasunog nga kabablayan in gintindog ha lote nga gintatag-iya han LGU-Calbayog.

Dida han pahayag ni Mayor Uy, posible nga deri na pabalikon ngadto han ira lugar an mga informal settlers ngan maghihimo an LGU hin housing project para han apektado nga mga pamilya.

Iginpatapod pa han alkalde nga kadam-an pa nga ayuda an maaaguman han mga biktima upod na denhi an tag 10 mil pesos kada pamilya tikang kan Samar 1st District Congressman Jimboy Tan, ug an Assistance to Individuals in Crisis Situation (AICS) tikang ha DSWD.

Hi Uy in naghangyo ha mga Calbayognon nga didto la anay pa-ukyon ha ira tagsatagsa nga panimalay an ira mga ka-urupdan nga nasunugan.#