Isumat.com/Abril 18, 2023
Malina-umon hi Mayor Remedio Veloso han San Isidro, Leyte nga igdidismiss an reklamo nga murder nga iginsalawad kontra ha iya ngan upat pa nga iba kasumpay han kamatay han anay Municipal Administrator han nasabi nga bungto.
Hi Veloso, upod an iya mga abogado, in nakighampang ha mga kaapi han media kakulop, Abril 17, 2023 kun diin ira iginpabati an ira panig mahitungod han murder complaint nga iginsampa han PNP-Criminal Investigation and Detection Group (CIDG) ha Leyte Provincial Prosecutions Office hadin nakalabay nga Marso 2023.
Iginbuyagyag han kampo ni Veloso nga nagsalawad na hira hin counter-affidavit hadin Abril 12, 2023 kun diin mahugot an ira pagdiwara nga nadadabi hira han insidente.
An CIDG in nagsampa han reklamo ha ngaran han pamilya han biktima, pero nagsering hi Veloso nga bisan ngani an pamilya han biktima in waray salabutan ngan deri maaram hini nga aksyon han CIDG.
Igindig-on han mga abogado han alkalde nga an pamilya han biktima in nagpirma hin affidavit nga deri gamiton ini nga isyu hin pamulitika ngan waray hira kunsultaha han CIDG mahitungod han pagsampa han reklamo.
Sumala han mga abogado ni Veloso, ha kasaysayan han Pilipinas, ini an gisasyahani nga reklamo nga iginsampa nga deri maaram an pamilya han biktima.
Igindig-on ni Veloso nga ordinaryo la hiya nga tawo ngan waray niya kapas sugad man deri akos han iya konsensya an pagpapatay hin bisan hin-o nga indibiduwal. Sering pa niya, makakapagpamatood an mga mulopyo han San Isidro nga deri niya maaakos ini nga bagay kay an iya la gintitinguha an pag-uswag ngan kamurayawan han iya bungto.
Nagtotoo hiya nga pulitika an rason kun kay-ano nga ginsampaan hira hin murder complaint ug iya gintudlok in usa nga “banggiitan nga pulitiko ha 3rd District han Leyte” nga nagpapaluyo hini nga mga panhitabo.
Kun manunumduman, hi anay Municipal Administrator Levi Mabini in ginpanmumusil ngan pinatay antis an election hadton 2019.
Dida han Marso 2023, an CIDG an nagsampa hin murder complaint ha Leyte Prosecutions Office kontra kanda Mayor Veloso, iya bugto nga hi Emmanuel Veloso, Police Officer Manuelito Sidaya, Cayetano Dagandan ngan duha pa nga iba.
Sumala kan Atty Ace Viagedor, abogado ni Veloso, ini nga reklamo in malisyoso ngan waray ginpapatamakan ug an panuyo hini amo an pag-harass ngadto han mga iginrereklamo.
Kumpiyansado hi Viagedor nga igbabasura ini nga reklamo han prosekusyon labi na kay duro hin kamatiwog-tiwog an ebidensya han CIDG nga iginpatamak la han deri tinood nga pahayag hin tulo nga testigo. Sering pa han abogado an tulo nga testigos in waray didto han lugar han matabo an krimen ngan himo-himo la an ira mga testamento.
Kun magigin patas an prosekusyon, segurado nga igbabasura ini nga reklamo pahayag pa ni Viagedor.
Iginpahayag pa han kampo ni Veloso nga an tulo nga mga testigos in gintagan hin “projects” han “banggiitan” nga pulitiko, sanglit lumimbag ngan hira na an gin-aakusaran han krimen. An mao nga mga testigos in ngatanan paryente han pamilya ni Mayor Veloso.
Waray magluwas hin ngaran an kampo han alkalde, pero ira iginpahayag nga an “mastermind” hini nga mga panhitabo amo in taga Villaba, Leyte.#
