Isumat.com/Abril 11, 2023
Ginpukdol nga puno hin lubi an naka-utod han kinabuhi hin usa nga high school student ha Lavezares, Northern Samar, Abril 10, 2023.
Ha report han PNP Regional Office, ginkilala an biktima nga hi Billy Joe Millapre, 14 anyos, high school student, samtang an suspetsado amo hi Noe Beraya, 36 anyos, inasaw-an, ngan chainsaw operator. An biktima ngan suspek in pareho residente han Brgy San Miguel han nasabi nga bungto.
Alas 2:30 han kulop hadto nga adlaw, hi Beraya in personal nga pumakadto ha Lavezares PNP Station pangaro hin bulig nga madara hi Millapre ha hospital.
Nagsumat an suspek nga pasado ala una han kulop, hiya in mag-uutod hin puno hin lubi didto han mao nga barangay. Iya pinanginano an palibot han lugar antis niya pagpudlon an lubi basi maseguro nga waray madidisgrasya.
Pero han mautod na an puno han lubi, may tawo nga nag-guli-at kay mayda ngay-an natumbahan han puno nga ginpudkol.
Ha bulig han kapulisan, gindara ha hospital hi Millapre pero binawi-an han kinabuhi samtang gintatagan hin medikal nga atensyon.
An suspetsado in aada ha kustudiya han PNP Municipal Station para han kaangayan nga disposisyon.
Ha iba nga balita, nag-antos hin karamtam ha lawas an usa nga sundalo han ma-aksidente an iya ginmamaneho-an nga motorsiklo ha Brgy San Juan, Sta Fe, Leyte, Abril 10, 2023.
Ha report han PNP, ginkilala an biktima nga PFC Bonifacio Zulueta II, 31 anyos, ulitawo, ngan nakadestino ha PDC ARESCOM, San Jose, Tacloban City.
Banda alas 9 han gab-i, hi Zulueta in nagbibiyahe tikang ha Pastrana tikadto ha Sta Fe han mawarayan hiya hin kontrol han manibela dida hin parte han pagliko kun diin gin-aayad an kalsada.
Tungod han iya pagsemplang, nag-antos hiya hin mga injuries ha magkalainlain nga parte han lawas ngan gindara ha Eastern Visayas Medical Center basi pagtambalon. #
