Isumat.com/Abril 5, 2023
An softball team han Tacloban City ngan tulo nga baseball squads han Pambujan, Northern Samar in makikigbanggaay han mga magbakod nga mga grupo ha bug-os nga nasud dida han National Championships han Little League Philippines Series ha Ilagan City, Isabela, Abril 10-16, 2023.
Kun manunumduman, nagkaada hin Visayas Finals hadton Pebrero didto ha Pambujan kun diin umapi an Tacloban, Pambujan, Maasin City, Calbayog City, sugad man mga teams tikiang ha Western ngan Central Visayas.
Dida han mao nga torneo, nahilakip ha top 2 ha ira tagsatagsa nga kategorya an mga Taclobanon ngan Pambujanon sanglit nag-qualify hira para han National Finals.
Sumala han organizers han Philippine National Finals, 63 nga mga teams tikang ha magkalainlain nga parte han nasud an magkakalantugi hin kadam-an nga dibisyon ha softball ngan baseball events dida han pito ka adlaw nga torneo.
An Tacloban nga gintatalagwasan han mga players tikang ha Tigbao-Diit Eelementary School in mag-ooyag ha 10-12 Girls Little League Softball Division. Ha luyo nga bahin, an tulo nga Nalucaban Kids han Pambujan in api ha Baseball Little League, Juniors Category ngan Seniors Division.
An national finals ha Isabela in importante hin duro kay an mga magkakampeon ha ira dibisyon in magkakaada hin tsansa nga makag-oyag ha Asia-Pacific Championships hiton Hunyo 2023.
An Asia-Pacific Games in bubuhaton ha South Korea samtang an iba nga kategorya in didto ha Clark, Pampanga.
An Asia-Pacific amo an magseserbe nga qualifying tournament para han World Series han baseball ngan softball. #
