Isumat.com/Abril 5, 2023

Katapos maghakot hin medalya dida han 2022 ASEAN Paralympics, gintatarget han taga Balangiga, Eastern Samar nga hi Roland Sabido nga maka-api ngan maka-angkon hin medalya ha World Paralympic Games nga bubuhaton ha England hiton Hulyo 2023.

Pero antis hini, kinahanglan makalusot anay hi Sabido dida han qualifying tournament nga hihimoon ha Singapore hiton Abril 26 – Mayo 2, 2023.

Hi Sabido upod an walo nga mga kaapi han Philippine Paralympic Swimming team in mabiyahe ngadto ha Singapore hiton Abril 25 basi makiglantugi ha World Para Swimming World Series. Ini nga torneo in magseserbe nga qualifying tournament basi madara ha World Games para han differently-abled athletes.

An kompetisyon ha Singapore in lakip gihapon han pag-ensayo han grupo nira Sabido para han tiarabot nga ASEAN Para Games ha Cambodia sunod nga bulan, sugad man Asian Para Games ha China hiton Oktubre.

An Estehanon nga para-athlete in beterano na ha magkalainlain nga mga torneo kun diin nahingadto na hiya ha Myanmar, Korea, Malaysia, Indonesia, New Zealand ngan Germany.

Dida han 2022 Asian Para Games ha Indonesia, hi Sabido in nakadaog hin gold medal ha 400 meters freestyle, silver medal ha 100 meter backstroke ngan bronze medal ha 4X100 meter relay.

Antis hiya nagin kaapi han RP Team, na-aksidente hi Sabido ngan na-utod an iya wala nga tiil, pero nagpabilin an makusog nga iya paglaum ngan pagkadto niya ha Manila, nagkaada hiya hin oportunidad nga mag try-out ngan malinangpuson nga nagin miembro han national team. #