Isumat.com/Abril 21, 2023
Naawat an kinabuhi hin usa nga empleyado han LGU-Ormoc City han pusilon hin waray panhikilal-i nga mga suspetsado kakulop han aga, Abril 20, 2023 ha Burgos St han nasabi nga syudad.
Subay han report han PNP, ginkilala an biktima nga hi Christopher Toledo, inasaw-an, Job Order employee nga naka-assign ha Ormoc Terminal ngan residente han Brgy District I.
Ha inisyal nga imbestigasyon, alas 7:55 han aga, hi Toledo in nagbibisekleta dida han nasabi nga lugar han pusilon hiya hin nakamotorsiklo nga duha nga suspek.
Naigo an biktima ha magkalainlain nga parte han lawas. Gindara hiya ha usa nga hospital pero igindeklarar nga dead on arrival.
An kapulisan in padayon an imbestigasyon han insidente basi madakop an mga gintatahapan ngan masabtan an motibo han krimen. #
