Isumat.com/Abril 23, 2023
Katapos hin tulo ka tuig nga nadiskarel an Eastern Visayas Regional Athletic Association (EVRRA) Meet tungod han Covid-19 pandemic, ma-arangkada na liwat an arasdangay han magkalainlain nga city ngan provincial divisions han Department of Education ug an defending champion Ormoc City an mananalinguha nga magpabilin ha ira kamot an over-all championship.
An mga oyag in titikangan Abril 24 ngan magtatapos hit Abril 28, 2023 ha magkalainlain nga mga venues ha Tacloban City, ug ha mga bungto han Palo ngan Tanauan, Leyte. kun diin sobra hin singko mil nga mga atleta tikang ha elementarya ngan sekondarya an maglalantugi.
Iginpahayag han DepED Regional Office nga an Opening Ceremony in bubuhaton Abril 25, Martes, alas 3 hit kulop ha Leyte Sports Development Center.
An Ormoc “Siglakas” athletes an nagin back-to-back champions hadton 2018 ngan 2019 katapos nira palusaron ha trono an Leyte Division nga naghadihadi han kompetisyon hin usa ka dekada.
Katapos hadto, waray na pagdumaraa an EVRAA han 2020, 2021 ngan 2022 tungod han epekto han pandemya ngan yana nga 2023, matetestingan kun akos la gihapon han mga Ormocanon nga depensahan an titulo o maagaw ini utro han Leyte Division.
Ginbabanabana nga ha swimming, track and field ngan pira nga ballgames an magigin surok han mga medalya han defending champion. Gin-uungara naman han Leyte Division nga mapatalsik an Ormoc ha syahan nga pwesto.
Labot la han Ormoc ngan Leyte, ginlalauman nga magpapakita hin pwersa an Samar Division ngan posible pumakalas an Tacloban City Division.
An Ormoc an nagpadara han gidadamu-i nga atleta (519), ginsundan han Eastern Samar (491), Calbayog City (483), ngan Tacloban City (482).
Ha luyo nga bahin, an Leyte Division in may 480 nga atleta, Samar 459, Northern Samar 433, Southern Leyte 399, Maasin City 360, Catbalogan City 306, Biliran 271, Borongan City 267, ngan Baybay City 199.
Kasagaran han mga oyag in hihimoon ha Leyte Sports Development Center (Grandstand) ngan may mga mulay ha Tacloban Astrodome, Palo ngan Tanauan.
An mga oyag ha outdoors sugad han track and field, swimming, softball, baseball, football, futsal, sepak takraw in hihimoon alas 6 tobtob alas 9 han aga ngan alas 3 tobtob alas 6 hit kulop basi makalikay an mga atleta ngan officiating officials han pelegro durot han kamapaso han temperatura.
