Isumat.com / Disyembre 12, 2022
Dako an pagtoo ni Philippine Army 8th Infantry Division Commander MGen Camilo Ligayon nga mapupukan na an insureksyon denhi ha Rehiyon Otso sunod nga tuig, labi na nga nadugangan an pwersa han mga tropa han gobyerno.
Usa ka batalyon hin Scout Rangers han pwersa armada han Pilipinas an umabot kakulop nga adlaw, Disyembre 11, 2022 nganhi ha Rehiyon Otso. An grupo nga sakay hin barko in dumunggo ha pantalan didto ha Calbayog City kakulop ngan igpapasarang hira ha Samar.
Ini amo an 4th Scout Ranger Battalion nga beterano na hin pakig-asdangay kontra han mga kaaway han gobyerno didto ha Jolo, Sulo; Zamboanga, Marawi City ngan Caraga Region.
Hi Ligayo in nagsering nga dako an mahibubulig han scout rangers tungod han ira hitaas nga kinaadman ngan estratehiya ha mga operasyon kontra han mga rebelde nga New Peoples Army.
Gintagan hin duon han heneral nga kinahanglan matapos na ini nga problema han insureksyon kay nakaka-ulang ini han kamurayawan ngan dayuday nga pag-uswag han rehiyon.
Kun manunumduman, ha deri pala maiha iginpahayag ni Philippine Army Visayas Commander MGen Benedict Arevalo nga tatagan niya hin hul-os nga atensyon an pagtumba han nasasalin nga pwersa han rebelde nga mga kumunista ha Eastern Visayas.
Hadin nag-agi nga pira ka bulan, kadam-an nga mga engkwentro ha butnga han kasundaluhan ngan mga rebelde an natabo ha Samar kun diin pira na nga mga higtaas nga opisyal han CPP-NPA an nagkamamatay, labot la han karekupo hin kadam-an nga high-caliber nga armas tikang han mga rebelde.
Gintutudlok han militar nga an nasasalin nga upat nga guerilla front han NPA in aadto ha Northern Samar ngan ini nga pwersa in ginkokomponer hin porlomenos 300 nga armado nga rebelde ngan mga supporters.#
