(Photos & Image courtesy of GMA and PEP.ph)

Isumat.com/ Disyembre 9, 2022

Dako nga paki-ana….kay-ano nga matatabo ini?

Sering hin usa nga doktor, ha kada 500,000 nga baby posible mayda usa ha ira an mabubutang hin parehas hini nga sitwasyon.

Hadton Septembre 19, 2022 igin-anak ha usa nga hospital ha General Santos City in usa nga baby girl nga dako hin duro an tiyan ngan tungod hini nga kahimtang, nagdesider an doktor ug an kag-anak han baby nga operahan hiya basi masabtan para masolosyunan dayon kun may problema ha panlawas.

Katapos han operasyon, duro an kalas han doktor kay nakadiskubre hiya hin fetus ha tiyan han baby girl.

Subay han pagsumat Maricris Albofera,an iroy han baby girl, temprano pa han iya pagburod, napapa-usa na hira nga dida han ultrasound nakikit-an gud nga deri normal an kadako han tummy han iya iginbuburod.

An syahan nga ira pagbanabana nga bangin na-aalikusan hin bituka o tina-e an iya baby. Tobtob nga nanganak hiya, amo ini pirmi an nagawas ha ultrasound.

Dida han iya paghinglaw, naklaruhan na gud nga nagpapanunubra an kadako han tiyan han iya anak kay tobtob ha dughan an pagbutol hini. Ngan katapos han operasyon, ginsumatan hiya han doktor nga may fetus ha tiyan han baby nga bagabaga hin nagburod liwat.

Nagsering an pediatrict surgeon nga hi Dr Mark Anthony Naval nga an ira nakuha in undeveloped fetus ha left ovary han baby girl. Ini nga fetus in napoporma na an mga braso, tiil, buhok ngan butagtok.

Tinatawag ini nga fetus on fetu. An karuyagsidngon hini “malformed vertebrate fetus enclosed within the body of its twin.”

Igin-esplikar han doktor tinatawag ini nga “parasitic twin” kun diin mayda karuha o kambal an baby nga didto nahurma ha iya tiyan. Sering niya nga usa han mga rasones hini amo an “unequal division of blastocyst formation, a cluster of dividing cells made by a fertilized egg.”

Para kan Dr Naval, ini an syahan nga kaso hin fetus on fetu nga iya iginkahibalag.

An baby girl in nagpapadayon an pagtika-upay an kahimtang han panlawas ngan talwas na ha peligro.

Sering pa man ni Mommy Maricris, bilib gud hiya han pagigin fighter han iya baby kay nakatalwas han kadelikaduhan nga iya gin-atubang tikang ha sulod han iya tiyan tobtob han panganak ngan katanggal han iya parasitic twin. #