Isumat.com/ Disyembre 9, 2022

Kinahanglan maghimo na hin konkreto nga mga pitad an gobyerno labi na an tagsa-tagsa nga Local Government Units ha Eastern Visayas kay nakaka-alarma na an damo nga ihap hin kabataan nga kulang an kahitas-on o binansagan nga mga “putad o bansot.”

Ha pahayag han National Nutrition Council (NNC) han Region 8, porlomenos 63, 655 nga kabataan nag-eedad hin 5-anyos tipa-ubos amo an ginkokonsiderar nga stunted, boot-sidngon may problema an ira pagtubo tungod han kulang nga nutrisyon, balik-balik nga impeksyon ha ira lawas, ngan deri bastante nga phychosocial stimulation.

Iginpahayag ni Dr. Catalino Dotollo, Regional Nutrition Coordinator, kinahanglan tagan gihapon hin tim-os nga atensyon han mga lokal nga lideres, magkalainlain nga sektor ngan tagsatagsa nga pamilya an sakto nga nutrisyon han kabataan. Sering han opisyal, sugadsugad nga napapasibay-an an nutrisyon tungod han iba nga mga isyu ha panlawas sugad han Covid-19 ngan iba pa nga sakit, pero deri angay hikalimtan an sakto nga nutrisyon.

An NNC in nagdumara hin pag-istudyo ngan dida han ira pag-monitor ha Eastern Visayas yana nga 2022, dida han 355, 004 nga kabataan nga ira ginsukol an kahitas-on, gumawas nga sobra 63 Mil ha ira in natudlok nga stunted. Ini in 14 porsyento han kabataan nga ira gin monitor.

Kinahanglan nga dida han syahan nga 1,000 nga adlaw tikang han pagburod han nanay, dapat insakto an nutrisyon basi kabalagban an stunting. Sering pa han NNC, an problema han pagkulang hin timbang o underweight in masosolusyunan pa, pero an problema han stunting in deri na kapupudngan.

Dida han record nga iginpagawas han NNC, ha probinsya han Samar an nag-uuna han kadamo han kabataan nga stunted nga 16.67 percent; nasunod an Eastern Samar 15.46; ngan Northern Samar 15.10 %.

Aadi an imahe han NNC mahitungod han porsyento han kabataan nga bansot ha mga lugar han rehiyon:

LEAVE A REPLY

Please enter your comment!
Please enter your name here