Litrato hin "astronaut "food or pills. (Photo CTTO)

Isumat.com/ Disyembre 8, 2022

Tungod han paghimakuri han ekonomiya ngan kulang nga pagkaon ha Pilipinas labi na gud han mga kablas, nagkamay-ada hin ideya hi Sagip Buhay Partlist Rep. Rodante Marcoleta – kun puede ba maka-imbento denhi ha aton nasud hin pagkaon sugad han ginbabalon han mga astronaut kun napakadto hira ha outer space hin hilawig nga panahon.

Dida han hearing han Commission on Appointments kakulop, Disyembre 7, 2022, hi Marcoleta in nagpaki-ana han Science & Technology Secretary Renato Solidum kun may kapasidad ba an iya departamento paghimo hini nga pagkaon han mga astronaut.

Sumala kan Marcoleta, an “astronaut food” in bagabaga la hin mga tabletas nga gintutumar ngan deri na nagluluto an mga astronauts kay bastante na hin pira ka semana an ira gintumar basi deri hira gutumon.

Dida han iya ideya, nagsering an kongresista, kun makaka-imbento hini nga tabletas denhi ha Pilipinas, ini an igpapanhatag ngadto han mga kablas basi deri na magproblema han ira kaka-unon ngan bisan pa kulang hin suplay hin pagkaon o deri maarakos an presyo han pagkaon, waray magigin problema hin gutom.

Bisan pa deri magkaon-kaon hin pira ka semana, deri manluluya o mamamatay an mga tawo, pahayag pa han magbabalaud.

An problema hini, waray kapasidad an Pilipinas pag-imbento hini nga pagkaon hapagkayana.

Nagsering hi Solidum nga an abilable yana amo an pagkaon para han mga biktima han trahedya nga magpapan-os kun deri makunsumo ha sulod hin unom ka bulan.

Ginklaro pa ni Solidum nga an gintatagan yana hin atensyon han DOST amo an pagkaada hin bastante nga suplay ngan produksyon hin pagkaon, pero nagsumat hiya nga tatagan nira hin pag-istudyo an suhestyon ni Marcoleta.

An magbabalaud in nagklaro naman nga ini nga astronaut food in deri amo an solusyon han kagutmanan, kundi pansapong la ini kun maabot an panahon nga nagkukulang o mahal an presyo han pagkaon. #