Isumat.com/8:15AM,June 24, 2020
Aminado hi Tacloban City Mayor Alfred Romualdez nga naabat hiya hin pagkabaraka dara han tigda nga pagdamo han nagkatatapnan nga mga health workers nga residente han Tacloban, pero iya igindig-on nga deri hiya nagpa-panic.
Dida han iya pahayag kakulop (Hunyo 23), hi Roumualdez in naghatag hin duon nga an sitwasyon yana in makababaraka, pero an iya pagpursegi nga pamunu-an an syudad ha pakatalwas hini nga krisis in deri matatabunan hin kahadlok.
Sering han alkalde nga kinahanglan humogpoy na an pagkatatapni ha mga health workers kay marurusdak an health services ha aton dapit. Kun damo pa nga medical personnel an matatapnan, magkukulang na an mga tawo nga magtitimangno han mga magsakit.
Deri la an COVID nga pasyente an gintatambal, aada gihapon in damo hin duro nga mga magsakiton tikang ha bug-os nga rehiyon ug makahurulop ini nga sitwasyon kun pipira-pira nala an magtitimangno nga health workers, pahayag pa han opisyal. Kasumpay hini, nanginyupo hi Roumaldez ha publiko nga deri mag ginawas-gawas kun deri kinahanglan basi deri na magtikadamo pa an matatapnan han virus.
Nanawagan gihapon hiya ha liderato han EVRMC nga magsumat ha iya kun ano an mga panginahanglan dida han hospital basi makahimo hiya hin paagi nga makabulig. Sumala pa ha iya, bisan kun deri niya sakop an pagdumara han nasabi nga hospital, andam hiya maghatag hin bulig basi la maseguro nga deri na magkatatapnan an personales hini.
Iginbuyagyag niya nga nagtukod hiya hin task force basi manginano ha EVRMC kun ano nga parte han proseso o higamit han hospital an may kakulangan.
Kadam-an han mga nagkatatapnan ha EVRMC in mga residente han Tacloban. Pira ha ira an gin-akomodar ha mga hotel nga ginrentahaan han syudad komo Isolation Units.
Iginsumat naman ni Romualdez nga tobtob yana, waray natapnan han virus nga mga personales han City Health Office ngan Tacloban City Hospital. #
