Isumat.com/2:45PM, July 15, 2020
Kinahanglan maseguro han Tacloban City Government nga deri makakalusot ngadto hin magraot nga elemento an mga impormasyon nga mahihikay dida han pagpa-rehistro ha pagkuha han Quick Response Code (QR Code).
Ini an iginpabati nga isyu ni Eugene Tan, an nangungulo han Philippine Chamber of Commerce and Industry ha aton dapit. Ini in tungod kay hitob Hulyo 16, titikangan na an paggamit han QR Code ha pagsulod han mga kostumer o kliyente ngadto hin mga establisimento ha Tacloban.
Kun magpa-rehistro basi makakuha han QR Code, gin-aaro an ngaran, address ngan cellphone number han indibiduwal nga karuyag magka-may-ada hini.
Nagsering hi Tan nga na-abuyon hiya han plano han gobyerno han syudad kay makakabulig ini han contact tracing han natatapnan han corona virus, pero bangin magkamay-ada hin aberiya an sestema hini ngan mahingadto an personal nga mga impormasyon hin deri maupay an mga panuyo ngan gamiton ini ha maraot nga katuyu-anan.
Iginsuhestyon niya ha City Government nga kinahanglan nahipapatik dida han patakaran han implementasyon hini nga QR Code nga an mga nagdudumara han Information Management Office han syudad o an mga personales nga may access ha impormasyon in papatukan hin sirot o penalidad ingkaso may mahigawas nga personal nga mga impormasyon.
Iginbuyagyag gihapon han negosyante nga nagpatawag an City Hall hin meeting upod an ira grupo basi igpasabot ini nga plano, pero waray ini madayon, ngan tobtob yana waray konsultasyon an City Government ha grupo han mga negosyante mahitungod hini nga proyekto.
Nag-aaro gihapon hi Tan hin grace period antis igpatuman ini nga proyekto basi makasabot an kadam-an nga katawhan kay kun tigda nga ig-implementar ini, maduroy hin kalugi an mga negosyo kay deri makakasulod ha mga tindahan an mga tawo nga waray QR Code Pass.
Ginklaro liwat niya nga maniningkamot an ngatanan nga negosyante han syudad ha pagsunod hini nga proyekto han LGU-Tacloban. #
