Isumat.com/Mayo 9, 2023
Nakagawas na ha syudad han Tacloban ngan adto na ha Cebu hi Sgt Van Gregory Benitez, an miembro han Tacloban PNP nga suspetsado pagpatay hin usa nga babaye pira na ka adlaw an nakalabay.
Ha interview han iFM-RMN Tacloban kan Tacloban Police Chief Col Michael Palermo yana nga adlaw, Mayo 9, 2023, iginsumat han opisyal nga subay han ira impormasyon, hi Benitez in adto na ha Cebu hapagkayana.
Hi Benitez an suspek pagpusil ngan pagpatay kan Jessica Durana ha Quarry District, Tacloban City hadton Mayo 6, 2023. Gintotoohan nga an suspetsado ug an biktima in may relasyon.
Ginseguro naman ni Palermo nga bubuhaton han Tacloban PNP an ngatanan basi matagan hin hustisya an biktima ug an iya pamilya.
Sumala kan Palermo, yana nga adlaw magsasampa na hira hin reklamo kriminal kontra kan Benitez ha City Prosecutors Office.
Nagsering pa hi Palermo, nagkaharampang an mga imbestigador han kaso ug an mga abogado han City Prosecution basi maseguro nga madig-on an kaso nga igsasalawad kontra han gintatahapan.
An iroy han biktima amo an panguna nga testigo ug susuportaran ini han mga material evidence nga nakolekta han mga imbestigador, dugang pa ni Palermo.
Hi Palermo in nagbuyagyag gihapon nga an abogado ni Benitez in nakigsumpayan ha ira ngan nagsering nga masurender an iya kliyente kun mayda na warrant of arrest kontra ha iya.
Ha atubangan hini, hi Palermo in nagpasarig nga deri mahunong an iya mga tauhan paghalpat kan Benitez bisan pa waray warrant of arrest nga iginpapagawas an korte.
